அருள்வாக்கி அப்துல் காதிர் புலவர் இலங்கை முஸ்லிம் தமிழ் இலக்கிய வரலாற்றில் தனித்துவமான இடத்தைப் பெற்ற புலவர்களில் முக்கியமானவராக அருள்வாக்கி அப்துல் காதிர் புலவர் விளங்குகிறார். ஆன்மீக ஞானம், தமிழ்ப்புலமை, சமூகப் பணிகள் மற்றும் கல்விச் சேவை ஆகிய துறைகளில் அவர் ஆற்றிய பங்களிப்புகள் இன்று வரை நினைவுகூரப்படுகின்றன. குறிப்பாக தெல்தோட்டை மண்ணின் கல்வி மற்றும் கலாசார வளர்ச்சிக்காக அவர் செய்த அர்ப்பணிப்புகள் அவரை அப்பகுதியின் பெருமைக்குரிய ஆளுமையாக உயர்த்தியுள்ளன.
பிறப்பும் கல்விப் பின்னணியும்
அப்துல் காதிர் புலவர் 1866 ஆம் ஆண்டு ஆகஸ்ட் 30 ஆம் தேதி கண்டிக்கு அருகிலுள்ள வீரபுரி என அழைக்கப்பட்ட தெல்தோட்டை பகுதியின் போப்பிட்டி கிராமத்தில் பிறந்தார். அவரது பெற்றோர் ஆ.பி. அல்லா பிச்சை ராவுத்தரும் ஹவ்வா உம்மாவும் ஆவர். இளமைக் காலத்திலிருந்தே கல்வியில் ஆழ்ந்த ஆர்வம் கொண்டிருந்த அவர் கண்டியில் அமைந்திருந்த இராணி கல்லூரியில் (தற்போது திரினிட்டி கல்லூரி) தமிழ் மற்றும் ஆங்கில மொழிகளைப் பயின்றார். பின்னர் மேலதிக தமிழ் இலக்கண மற்றும் இலக்கியப் பயிற்சிக்காக தென்னிந்தியாவுக்குச் சென்று மதுரை திருப்பத்தூரில் வித்துவசிரோமணி மஹ்மூது முத்துவாப்பா புலவரிடம் முறையாகக் கல்வி கற்றார். தமிழ், ஆங்கிலம் மற்றும் அரபு மொழிகளில் சிறந்த புலமை பெற்றிருந்தார்.
கல்விச் சேவையும் சமூகப்பணியும்
அப்துல் காதிர் போப்பிட்டியில் திண்ணைப்பள்ளி ஒன்றினை நிறுவி நடத்தி வந்தார். உடுதெனியா, பட்டியகாமம் ஆகிய பகுதிகளில் செய்கு சுலைமானுல் காதிரியவர்களுடன் சேர்ந்து சமூகசேவை புரிந்து, பல பள்ளிவாயில்களையும் நிறுவுவதற்குத் துணை புரிந்தார்.
இலக்கியப் பங்களிப்புகள்
அருள்வாக்கி அப்துல் காதிர் புலவர் சிற்றிலக்கிய மரபில் தனித்துவம் வாய்ந்த படைப்பாளராகத் திகழ்ந்தார். அந்தாதி, பதிகம், குறவஞ்சி, பிள்ளைத்தமிழ் உள்ளிட்ட பல்வேறு இலக்கிய வடிவங்களில் நூல்களை இயற்றினார். தமிழ்-இஸ்லாமிய இலக்கிய வளர்ச்சிக்காக முப்பதுக்கும் மேற்பட்ட நூல்களைப் படைத்துள்ளார். அவரது படைப்புகளில் சில திருப்பத்தூர் அச்சகத்தில் வெளியிடப்பட்டன. “பிரான்மலைப் பதிகம்” 1887 ஆம் ஆண்டு சென்னை நகரில் அச்சிடப்பட்ட அவரது முதல் நூலாகக் கருதப்படுகிறது.
அவரது குறிப்பிடத்தக்க நூல்களில்:
• கண்டிக் கலம்பகம் • கண்டிப் பதிற்றுப்பத்தந்தாதி • சலவாத்துப் பதிகம் • மெய்ஞ்ஞானக் குறவஞ்சி • மெய்ஞ்ஞானக் கோவை • காரணப் பிள்ளைத்தமிழ் • பிரபந்த புஞ்சம் • பேரின்ப ரஞ்சிதமாலை • ஞானப் பிரகாச மாலை • நவமணித் தீபம் • சந்தத் திருப்புகழ் போன்றவை முக்கியமானவையாகும்.
இலக்கிய ஆளுமை
அப்துல் காதிர் புலவர் கவியரங்குகளில் தனது அட்டாவதானத் திறமையால் பெரிதும் புகழ்பெற்றார். இலங்கையிலும் தமிழ்நாட்டிலும் உள்ள இறைநேசர்களின் அடக்கஸ்தலங்களை மையமாகக் கொண்டு பல மாலைகளையும் பிரபந்தங்களையும் இயற்றினார். அவரது ஞானாசிரியராக ஷிஹாபுதின் வலியுல்லா விளங்கினார். அவரை போற்றிப் “பதிற்றுப்பத்தந்தாதி” பாடியுள்ளார். மேலும் மீரா மக்காம் தர்காவில் “தர்கா வித்வான்” என்ற கௌரவத்தையும் பெற்றார். பேராசிரியர் எம்.ஏ. நுஃமான், அருள்வாக்கியின் நூல்களில் இடைக்காலத் தமிழ்ச் செய்யுள் மரபும் இஸ்லாமிய ஆன்ம ஞானமும் ஆழமாக பிரதிபலிப்பதாகக் குறிப்பிடுகிறார். பல்வேறு பிரபந்த வடிவங்களையும் அவர் திறமையாகக் கையாள்ந்துள்ளதாகவும் பாராட்டியுள்ளார். ஆய்வுகள் மற்றும் விவாதங்கள் அப்துல் காதிர் புலவர் மதுரை திருப்பத்தூரைச் சேர்ந்தவர் என்ற கருத்து ஒரு காலத்தில் நிலவியது. பின்னர் எஸ்.எம்.ஏ. ஹசன் மேற்கொண்ட ஆய்வுகள் மூலம் அவர் இலங்கையைச் சேர்ந்தவர் என்பதும் தெளிவுபடுத்தப்பட்டது. மேலும் “தன்பீகுல் முரீதீன்” என்ற உரைநடை நூல் தொடர்பாகவும் பல கருத்துக்கள் முன்வைக்கப்பட்டன. அறிஞர் சித்திலெப்பையின் “அஸ்றாறுல் ஆலம்” நூலை எதிர்த்து எழுந்த விமர்சனங்களுக்கு பதிலளிக்கும் வகையில் அப்துல் காதிர் இந்த நூலை எழுதியதாக ஆய்வாளர்கள் குறிப்பிடுகின்றனர். பெற்ற பட்டங்களும் கௌரவங்களும் இளம் வயதிலேயே கவியரங்குகளில் பங்கேற்று “யாழ்ப்பாண சங்கன்” மற்றும் “மெய்ஞ்ஞான அருள்வாக்கி” என்ற சிறப்புப் பட்டங்களைப் பெற்றார். 1912 ஆம் ஆண்டு யாழ்ப்பாணத்தில் அவர் ஆற்றிய சொற்பொழிவுகளுக்காக அசனுலெப்பைப் புலவரின் தலைமையில் “வித்துவ தீபம்” பட்டம் வழங்கப்பட்டது. அதோடு “நிமிட வித்துவான்” என்றும் அழைக்கப்பட்டார். பின்னாளில் கிடைத்த அங்கீகாரங்கள் அவரது தமிழ்ப்பணியைப் பாராட்டும் வகையில் 1993 ஆம் ஆண்டு இலங்கையின் ஏழாம் வகுப்பு பாடத்திட்டத்தில் அவரது பாடல்கள் சேர்க்கப்பட்டன. 1965 ஆம் ஆண்டு தினகரன் நூற்றாண்டு சிறப்புமலர் வெளியிடப்பட்டது. 1973 ஆம் ஆண்டு எஸ்.எம்.ஏ. ஹசன் அவரைப் பற்றிய ஆய்வு நூலை வெளியிட்டார். மேலும் 2018 ஆம் ஆண்டு “ஞானம்” கலை இலக்கிய சஞ்சிகை அவரது நூற்றாண்டு நினைவாக சிறப்பிதழை வெளியிட்டது.
மறைவு
அருள்வாக்கி அப்துல் காதிர் புலவர் தனது 52 ஆவது வயதில், 1918 ஆம் ஆண்டு செப்டம்பர் 18 அன்று கண்டியில் உள்ள தனது இல்லத்தில் காலமானார். இன்றும் அவரது கல்விச் சேவைகள், இலக்கியப் பங்களிப்புகள் மற்றும் ஆன்மீகச் சுவடுகள் தமிழ் மற்றும் இஸ்லாமிய இலக்கிய உலகில் அழியாத தடமாகத் திகழ்கின்றன. Note: This picture has been digitally generated/restored from an old photograph using Artificial Intelligence (AI) technology. Minor enhancements and corrections may have been applied to improve image quality while preserving the original appearance as closely as possible. source:facebook post
📷 Photo Gallery
Use arrows to browse · Click to view full size
